Zargin Rashin Tallafa wa Ƙananan Hukumomi Ba Gaskiya Ba Ne – Shugaban Ƙaramar Hukumar Dawakin Tofa Ya Kare Gwamna Abba Kabir Yusuf
Shugaban Ƙaramar Hukumar Dawakin Tofa, Hon. Anas Mukhtar Bello Danmaliki, ya bayyana cewa zargin da ake yi na cewa Gwamna Abba Kabir Yusuf ba ya bai wa ƙananan hukumomi haƙƙinsu ba shi da tushe, yana mai cewa ayyukan ci gaban da ake gani a faɗin ƙananan hukumomin Jihar Kano su ne hujja mafi ƙarfi da ke tabbatar da cikakken goyon bayan gwamnatin jihar.
Danmaliki ya bayyana hakan ne a cikin wata sanarwa inda ya ce tun bayan hawan Gwamna Abba Kabir Yusuf mulki, gwamnatin jihar ta bai wa ƙananan hukumomi cikakken goyon baya ta hanyar samar musu da ƙarin tallafin da ya ba su damar aiwatar da manyan ayyukan raya ƙasa, duk da ƙalubalen kuɗaɗen shiga da wasu daga cikinsu ke fuskanta.
Ya ce da yawa daga cikin ƙananan hukumomi na kashe mafi yawan kuɗaɗen shigarsu wajen biyan albashi, lamarin da ke rage musu damar gudanar da ayyukan ci gaba. Sai dai, a cewarsa, gwamnatin jihar ta cike wannan giɓi ta hanyar ba su ƙarin tallafi domin tabbatar da cewa babu wata ƙaramar hukuma da aka bari a baya.
Danmaliki ya bayyana Ƙaramar Hukumar Dawakin Tofa a matsayin misali, inda ya ce cikin shekaru biyu an gina sabbin makarantu guda shida, cibiyoyin lafiya guda uku, tare da inganta cibiyoyin lafiya na matakin farko sama da 25. Haka kuma, an ba ɗalibai sama da 1,000 guraben karatu, an gyara makarantu da dama tare da gina hanyoyin karkara a sassa daban-daban na ƙaramar hukumar.
Ya ƙara da cewa gwamnatin ta samar da rijiyoyin burtsatse masu amfani da hasken rana guda 18 da kuma rijiyoyin hannu masu yawa domin inganta samar da ruwan sha ga al’umma.
A cewarsa, sama da matasa 200 sun amfana da shirin ba su babura a matsayin jari, yayin da matasa da mata da dama suka samu tallafin kuɗi domin fara ko bunƙasa sana’o’insu.
Ya kuma ce an samu gagarumin ci gaba a fannin tsaro ta hanyar gina sabbin ofisoshi ga Hisbah, Vigilante da NDLEA tare da samar musu da kayan aiki da motocin zirga-zirga.
Danmaliki ya jaddada cewa babu wata mazaɓa a Ƙaramar Hukumar Dawakin Tofa da ba ta amfana da aƙalla ayyukan ci gaba guda goma ba, yana mai cewa irin wannan ci gaba ya shafi Bichi, Kabo, Rimin Gado, Tudun Wada, Ungogo da sauran ƙananan hukumomi 44 na jihar.
Ya yi tambaya cewa, “Ina aka samu kuɗaɗen aiwatar da waɗannan ayyuka idan ba daga cikakken goyon baya da tallafin gwamnatin Mai Girma Gwamna Abba Kabir Yusuf ba?”
Danmaliki ya yi kira ga masu sukar gwamnati da su yi adalci wajen yin hukunci, yana mai cewa ayyukan ci gaba da ake gani a zahiri sun fi kowace magana bayyana irin goyon bayan da gwamnatin jihar ke bai wa ƙananan hukumomi.
Ya kuma yi addu’ar Allah Ya ƙara wa Gwamna Abba Kabir Yusuf lafiya, hikima da nasara wajen ci gaba da jagorantar Jihar Kano zuwa ga ci gaba mai ɗorewa.